NAKADAWAT og bag-ong hospital equipment ang walo ka Misamis Oriental Provincial Hospital (MOPH) gikan sa nagkadaiyang non-government organizations ug pribadong sektor atol sa turn-over ceremony nga gipahigayon sa Kapitolyo Probinsyal. Kini nga ekipo gilangkoban sa defibrillator ug ElectroCardioGram (ECG) Machine gikan sa Capitol University Medical Center, Ultrasound Machine gikan sa Clarenson Marketing, hospital beds ug mechanical wheelchairs gikan sa A Brown Company ug wheelchairs ug nebulizers gikan sa Philippine Charity Sweepstakes Office (PCSO) Misamis Oriental Branch ug Hexaprime Inc. Matud ni A Brown Company Executive Vice President- Construction and Development and Chief Operating Officer Engr. John L. Batac, kabahin kini sa ilang Corporate Social Responsibility (CSR) agi’g pagtabang ug paghatag balik sa komunidad partikular sa mga ospital sa lalawigan.

Sumala ni Provincial Health Officer Dra. Bebina Casiño, dakong tabang ang mga donasyon ilabi na sa mga pasilidad nga adunay limitadong kahinguhaan. Gipasalamatan usab niini ang mga partner nga misuporta sa probinsya aron mapadayon ang paghatag og dekalidad ug accessible nga serbisyo sa panglawas. Matud ni MOPH- Claveria Chief of Hospital Dr. Pilardo Ledesma, Jr. dakong tabang ang matag ekipo alang sa ilang hospital operations. Tungod niini, mapasalamaton kini sa pagpaningkamot sa gobernadora nga matabangan nga mapalambo ang serbisyo sa ilang ospital. Tumong ni Governor Juliette Uy nga ang mga ekipo makatabang aron dili na kinahanglan nga moadto pa sa dakbayan ang mga pasyente alang sa pipila ka mga serbisyo medikal. Gawas niini, gibutyag usab sa gobernadora ang pagpatukod sa mga dialysis centers ngadto sa mga dapit sa Gingoog City, Alubijid ug Manticao pinaagi sa Public Private Partnership (PPP).

Dugang pa niini, anaa na sa bidding process ang surgical microscope nga gamiton alang sa cataract removal services sa mga ospital sa umalabot. Nagpasalamat ang gobernadora sa tanang organisasyon ug pribadong sektor nga naghatag sa ilang suporta ug donasyon nga nagpakita sa ilang pagpakabana alang sa kahimsog ug kaayohan sa mga Misamisnon.

Kini usa ka timaan sa lig-on nga pagpaningkamot sa gobernadora aron mahatagan sa accessible, episyente ug kasaligan nga serbisyo sa panglawas ang katawhan sa probinsya.

By: Jane Salimbao/PIO

Hulagway kuha ni: Jez Ecuacion/PIO