9,000 BALIK ESKWELA BAGS IPANG APOD-APOD SA MGA MAGTUTUNGHA SA PROBINSYA By: REYMARK SEMAÑA/PIO

Posted: September 14, 2021

240992261_357277146139109_8393360571956102113_n

PUNO sa paglaum ngadto sa mga kabataang magtutungha sa Misamis Oriental ang tumong ni Governor Bambi Emano sa paghatag og Balik Eskwela Bags.

Natigayon ang pag turn-over sa maong mga bags nga adunay sulod nga mga educational supplies ngadto sa Department of Education pinaagi ni SDS-Misamis Oriental Dr. Jonathan Dela Peña atol sa Brigada Eskwela culminating activity niadtong Septiyembre 6, 2021 sa Patrocinio National High School, munisipyo sa Claveria.

Mokabat sa Php 6,000,000.00 ang kinatibuk-an nga kantidad sa maong mga bags nga matud ni SDS Dela Peña makahatag og paglaom sa mga magtutungha nga sa umaabot mobalik ra sa normal ang tanan ug masul-ob nila ang maong mga bags sa ilang pagtungha.

“Kaning Balik Eskwela bags worth 6 million, this will give hope to our children, dili lang siya tabang nga physical pero murag psychosocial. These (bags) will give a feeling of hope nga mobalik ra kita sa normal, nga makasul-ob lang gihapon sila sa bag to go to the schools physically.”  pahayag ni SDS Dela Peña.

Gipasabot ni Governor Bambi nga matag tuig mokabat 4,500 ka mga bags ang iya gaitunol apan sa pagbuto sa COVID-19 pandemic giusa na lamang nila ang paghatag niini  karon ug sa miaging tuig.

Malaumon ang amahan sa lalawigan nga pinaagi sa mga school bags mabati sa mga tinun-an nga bisan paman sa pandemya gikinahanglan kini nga mga butang aron aduna silay inspirasyon ug kanunay nga excitement diha sa pagtungha niining new normal.

Nasayod ug nabati usab ni Governor Bambi ang mga panginahanglan sa mga magtutungha ug mapasalamaton kini nga pinaagi sa Local School Board sa probinsya iyang napaabot ngadto kanila ang mga kagamitan nga dako og ikatabang  sa ilang pagtungha.