AGOSTO 24, BUKSAN ANG SCHOOL YEAR 2020-2021

Posted: May 21, 2020

2152020-24

GIKATAKDA nang magbukas ang School Year 2020-2021 karong Agosto 24, 2020, base sa rekomendasyon sa Department of Education – Schools Division of Misamis Oriental ngadto sa local interagency task force sa Misamis Oriental.
Pasabot ni DepEd-MisOr Schools Division Superintendent Mr. Jonathan Dela Peña, dili pasabot nga kinahanglan gayud motungha physically sa mga estudyante sa nasangpit nga petsa. Mag-depende kono gihapon kini sa sitwasyon sa matag lungsod o dakbayan kalabot na sa hulga sa pagtakboy sa coronavirus disease 2019 sa ilang lugar, bisan pa nga si Gov. Bambi Emano naghangyo gayud nga sigurohon ang luwas nga tulunghaan sa tibuok Misamis Oriental batok COVID-19.
Apan, nangandam na matud pa ang DepEd kon unsa nga mode of learning ang ilang gamiton—online ba o home school. Kon ugaling mahidayon nga motungha gayud sa tulunghaan ang mga estudyante, adunay himuon nga massive disinfection ug misting ilang himuon.
Kapin kon kulang 300,000 ka magtutungha ang gilauman karon nga school year. Malipayon si Mr. Dela Pena sa mitaas nga ihap sa enrolees karon nga tuig.