Personal nga gi-endorso ni Provincial Governor Pedro M. Unabia ni-adtong Huwebes ang katukuran sa Agricultural Complex nga mag silbe og processing center sa tanang produkto sa agrikultura sa silangang bahin sa lungsod sa Magsaysay.

Mismo si Magsaysay Municipal Mayor Charlie Buhisan ang misugyot nga tukuron kining maong proyekto atol sa Provincial Development Council’s (PDC) meeting ni-adtong Agusto 18, 2022 sa syudad sa Cagayan de Oro.

Kung matuman, ang agricultural complex mo’y mag usa sa mga pasilidad sa agrikultura sama sa dressing plant, slaughter house, grain grinder, livestock ug vegetable supplies.

“Mahimo pud og agricultural trading hub para sa mga negosyante ang agricultural complex sa mga kasikbit nga rehiyon,” matod ni Buhisan.

Ang Magsaysay mao’y pinaka-ulahing munisipyo sa silangang distrito sa Misamis Oriental nga nag silbe usab nga utlanan sa munisipyo sa Carmen sa Agusan del Norte. Suportado ni Gov. Unabia ang maong sugyot labi pa kay ang kalambuan sa natad sa agrikultura ang unod sa PAGLAUM development agenda sa iyang administrasyon.

BY: NEFILIM R. DIAZ/PIO