PORMAL nga gitunol sa Fantasyland ang ilang amusement tax sa Panggamhanang Probinsyal pinaagi kang Governor Juliette Uy sa Kapitolyo. Kini isip ilang buhis alang sa mga bulan sa Enero paingon Marso ning tuiga nga nagkantidad og P134,505.00. Kini dakong tabang aron mapadayon ug mapalig-on pa ang mga nagkadaiyang serbisyo ug programa sa probinsya alang sa katawhan. Sa milabay usab nga turnover, nakahatag ang Fantasyland og P230,165.00 nga amusement tax alang sa bulan sa Disyembre 2025. Bisan ginagmay ang matag period sa ilang bayrunon, padayon ug matinud-anon gihapon silang nagabayad sa ilang obligasyon nga buhis ngadto sa probinsya.
Ang Fantasyland usa ka bag-ong tourist attraction sa Misamis Oriental nga nahimutang sa lungsod sa Tagoloan. Matud ni Fantasyland Tagoloan Operations Manager Ms. Jaynah Jalosjos, maghatag sila og libreng sakay gamit ang shuttle service gikan sa Capitol Compound paingon sa Fantasyland Tagoloan ug vice versa aron mas sayon ug komportable ang pagbyahe sa mga bisita. Gihisgutan usab ang plano sa pagpangita og maayong pick-up point alang sa mga bata uban sa ilang mga ginikanan aron mas mapadali ang pagsakay paingon sa amusement park samtang masiguro ang ilang kaharuhay ug kaluwasan.
Nagpakita lamang kini nga pinaagi sa panaghiusa sa pribadong sektor ug gobyerno mahimong makab-ot ang kalamboan ug mas mapalapdan pa ang kaayohan sa tanan.
By: Jane Salimbao/PIO
