ANGAYAN BUHATON SA PAGBATOK SA COVID-19 GIPASABOT NI DR. CALINGASAN

Posted: June 22, 2020

22062020-11

NAGHANGYO ang chairman sa Provincial Task Force for Covid 19 nga si Dr. Jerie Calingasan ngadto sa tanan empleyado sa kapitolyo probinsyal o bisan sa katawhan sa lalawigan sa Misamis Oriental nga magsunod sa mga gabayan aron makalikay gyod sa corona virus disease.
Unang pahimangno niini nga maghugas og kamot kanunay. Bout niini nga magbutang og mga lavatory sa palibot sa kapitolyo probinsyal aron maanad ang mga empleyado sa pagpanghugas sa ilang mga kamot gamit ang liquid soap.
Mahimo sab nga mogamit og alcohol apan alternatibo lamang kini kon ugaling walay presensya sa hugasan og kamot sa palibot.
Ikaduhang pahimangno niini nga likayan ang close contact tungod kay matud niini nga 6 feet ang kalay-on pwede pa matakdan hinungdan batasanon ang physical distancing sa duha ka metros ang kalay-on.
Gimandoan sab niini ang tanan nga magsul-ob sa kanunay og facemask ug mahimo lang ang cloth mask. Ang mga surgical mask mahimo lang kining ireserba usa sa mga frontliners ug healthworkers.
Pasabot niini nga ang pagsul-ob og facemask 85% niini nga i lessen ang infection.
Batasanon sab ang paglimpyo ug pag disinfect sa palibot lakip ang mga tagsa tagsa ka buhatan.
Dugang niini nga monitoron sab ang gibati ug magtemperatura matag alas 8:00 sa buntag ug alas 1:00 sa hapon maoy rason gihatagan ang mga empleyado og tagsa tagsa ka thermometers.
Kung molapas sa 37.7 degrees celcius ang temperatura dili na maglaag ug magpuyo sa panimalay ug ipahibalo ang barangay labina nga hugot nga gimonitor karon ang mga nagbaton og influenza like illness.
“Sa katawhan sa lalawigan ug sa Cagayan de Oro ang akong ikasulti is dili magkumpiyansya,” matud ni Dr. Calingasan.