PADAYONG miarangkada ang programang Bigay Bigas Para sa Masa ning probinsya uban ang tiunay nga kolaborasyon sa matag LGU ug paghingusog usab ni Gov. Juliette T. Uy. Dugang 20,759 ka mga indibidwal kon household beneficiaries ang naka-benepisyo nga gilangkoban sulod sa mga lungsod sa Lugait, Manticao, Naawan ug Initao. Kini natigayon sa usa ka adlaw, niadtong Hunyo 5, 2026. Sa maong higayon mihatag sa iyang mensahe si Gov. Uy nga misentro sa iyang saad nga anaa kanunay alang sa katawhan ug ang panghinaot nga maghiusa ang tanan aron mapalig-on ang mga programa lakip malugwayan ang tanang serbisyo.
Samtang sila si Provincial Board Member Princess Emano, DILG Mis Or Provincial Director Engr. Marisia Naybe, DSWD 10 Protective Services Division Chief Sean Pamela Balais, mga mayores matag lungsod, COA representative lakip Brgy. Officials miawhag sa tanan anaa kanunay ang gobyerno ilang kadangpan panahon sa kalisod. Dako usab ang pasalamat sa mga benepisyaro tungod ilang nabati ang igong pagtagad kanila labina ning nasinating grabing krisis sa kasamtangan. Alayon kini sa Local Government Support Fund – Financial Assistance to Local Government Units gikan sa nasyonal nga programa kung asa madasigong giimplementar dinhi sa Mis Or.
Gumikan sa maong inisyatiba, ubay-ubay na ang natabangang mga indibidwal ug pami-pamilya nga nasutang anaa sa vulnerable sectors sama sa senior citizens, PWDs, Solo Parents, farmers & fisherfolks, public transport workers, ug kadtong walay permanenteng trabaho. Kahinumdomang sukad kini gilusad nga programa, padayon pa gihapong gipanglimbasogan nga ang tanang labing nanginahanglan mao gayod ang maka-benepisyo. Agi’g kinasing-kasing nga pag-serbisyo ni Gov. Uy aron masulbad ang problema sa kakulangon sa pagkaon pinaagi sa rice assistance.
Alang sa musunod adlaw, laing mga batches na usab sa nagkadaiyang barangay itigayon ang susamang kalihukan.
By: Rejiann Ammor R. Maygay/PIO
Hulagway kuha ni: Andy Pacamalan/PIO
