BRGY. NUTRITION SCHOLARS HONORARIUM, I-RELEASE NA

Posted: May 29, 2020

29052020-4

GIKATAKDANG i-release na ang honorarium sa mga BNS kon Barangay Nutrition Scholars alang sa 1st quarter sa tuig 2020.
Mikabat sa P1,683,000 ang gitunol ni Gov. Bambi Emano alang sa 561 ka BNS pinaagi ni Provincial Health Office-Nutrition Division head Ms. Marites Gomez atol sa sinemanang pagpakayab sa nasudnong bandila via Zoom app niadtong Martes, Mayo 26.
Makadawat ang matag BNS sa tag-P3,000 alang sa bulan sa Enero padulong Marso, kantidad nga karon lang misaka sa pagpungko ni Gov. Emano. Gikan sa P9,000 matag tuig sa milabay nga 20 na ka tuig, nahimo kining P12,000 matag tuig sa kasamtangang administrasyon ni Gov. Emano.
Si Ms. Puribel Talaroc, ang presidente sa BNS Federation sa Misamis Oriental, nagkanayon nga daku na’g ikatabang ang nasangpit nga kantidad sa ilang inadlaw-adlaw nga panikaysikay, hilabina ning panahon sa krisis nga hatud sa hulga sa coronavirus disease 2019.