DILI matukib ang kalipay sa mga kabatan-onang campus journalism radio broadcasting champions gikan sa probinsya atol sa ilang pagbisita sa buhatan ni Governor Juliette Uy niadtong Abril 7, 2026. Kini human positibo ug hugot nga gisuportahan sa gobernadora ang ilang umalabot nga pagsangka sa National School Press Conference (NSPC). Moabot sa 20 ka mga student journalist ang gitakdang mosangka sa maong kompetisyon karong umalabot Abril 13-17 ning tuiga sa Ormoc, Leyte. Ang mga delegado naggikan sa nagkadaiyang tunghaan sa probinsya partikular sa mga lungsod sa Balingasag, Villanueva, Claveria ug Lugait.

Mapasalamaton si Janice S. Berigay, usa ka magtutudlo, Campus Journalism Advisor ug Head Coach sa Filipino Radio Broadcasting gikan sa Baliwagan, Balingasag gumikan sa paspas nga tubag sa gobernadora alang sa ilang hangyo nga suporta. Atol sa panagtigom, mihatag si Governor Uy og ₱150,000 nga pinansyal nga tabang alang sa transportasyon sa mga delegado. Tungod niini, mas nadasig ug mas napalig-on ang kadasig sa mga kabatan-onan sa pagpresentar sa probinsya dala ang hugot nga suporta gikan sa lokal nga panggamhanan.

Nagpadayag kini sa walay hunong ug lig-on nga suporta ni Governor Juliette Uy sa pag-amuma sa talento ug pangandoy sa kabatan-onan sa Misamis Oriental nga mahinungdanon alang sa mas hayag nga kaugmaon sa probinsya sa umalabot.

By: Jane Salimbao/PIO

Hulagway kuha ni: Charm Andy Pacamalan/PIO