CHILD DEVELOPMENT CENTER NGA GIPATUKOD NI GOV. BAMBI SUPORTADO NI SENATOR SONNY ANGARA

Posted: August 13, 2020

13082020-3

USA sa mga progresibong programa ni Governor Bambi Emano mao ang kanunany nga pagpalambo sa sektor sa edukasyon, partikular sa mga gagmayng bata o kadtong anaa sa early childhood.

Subay niini, gipanghingusgan sa amahan sa lalawigan pinaagi sa Provincial Early Childhood Care and Development Office (PECCDO) nga gipangulohan ni Ms. Maryden Ocot ang pagpatukod sa mga Child Development Center sa tibuok lalawigan sa Misamis Oriental.

Labina kadtong mga lagyong dapit sa lalawigan nga nanginahanglan nga makabaton og kaugalingong center ang barangay.

Tungod sa kakugi ug dedikasyon sa amahan sa lalawigan nga giubanan sa maabtik nga lihok ni Ms. Maryden Ocot, gisuportahan ni Senador Sonny Angara pinaagi sa Genereal Appropriations Act (GAA) ang mga programa sa ECCD ug naghatag kini ug pondo alang sa pagpatukod og dugang mga Child Development Center sa lalawigan.

Gumikan sa suporta ni Senador Angara, napatukod ang usa ka modernong Child Development Center sa Brgy. Santa Ana, lungsod sa Tagoloan.

Atol sa kahumanan sa maong proyekto, subling nihatag ug dugang nga pondo si Senator Angara alang na usab sa katukoran sa tulo ka Child Development Center kon diin dul-an P10 milyon na ang pundo nga nahatag niini.

Ang suporta ni Senador Angara nagpamatuod nga dako ang pagsalig sa nasudnong panggamhanan ngadto sa kapabilidad, sinseridad, ug integridad ni Governor Bambi ngadto sa iyang mga proyekto alang sa katawhan sa Misamis Oriental.