GITUTOKAN karon sa Panggamhanang Probinsyal sa Misamis Oriental ug Food Terminal Incorporated (FTI) ang posibleng pagtukod og cold storage facilities ug processing plants aron makatabang sa pagpreserba ug pagpalambo sa mga produkto sa mga mag-uuma ug mangingisda sa probinsya. Kini ang nahisgutan atol sa coordination meeting tali sa FTI ug sa Panggamhanang Probinsyal subay sa gipresentang proposal nga gipangulohan ni Deputy Project Director Architect Cory Guanzon ug Assistant Architect Randolph Chan. Matud ni Guanzon, ang inisyal nga tumong sa ilang pagbisita mao ang paghisgot ug pagpaila sa National Food Hub ug pag-ila sa posibleng lugar sa lalawigan nga mahimong tukoran niini.
Apan human sa konsultasyon ug input gikan ni Department of Agriculture Regional Director Jose Apollo Pacamalan, Governor Juliette Uy ug nagkadaiyang provincial departments, nasabotan nga mas angay sa panginahanglan sa probinsya ang mga customized food hubs hilabina ang cold storage facilities. “National food hubs are on a larger scale, mao nga nausab ang discussion. Tungod sa inputs sa nagkadaiyang departamento ug ni Governor, maghimo na ta og RFTs, specifically para sa mga cold storage sa probinsya,” matud ni Guanzon. Dugang niini, dako og ikatabang ang cold storage facilities sa mga mag-uuma ug mangingisda tungod kay adunay tukmang lugar diin mahimong tipigan ug mapreserbar ang ilang mga ani ug pangisdaan.
Matud pa niya, kulang pa sa hapsay ug tukmang storage facilities ang probinsya, busa dako ang posibilidad nga ang maong proyekto makatabang sa pagminus sa pagkadaot sa mga produkto ug pagpalambo sa kita sa mga producers. Gihisgutan usab sa maong miting ang posibilidad sa pagtukod og processing plants subay sa sugyot sa gobernadora nga mahimong dugang nga suporta sa pagproseso ug pag-value-add sa mga produkto sa lokal nga mga mag-uuma ug mangingisda. Matud ni Guanzon, pagatun-an pa sa FTI ang mga panginahanglan ug posibleng lokasyon sa nagkadaiyang lungsod sa lalawigan aron matino kung asa labing mahimong ipatuman ang maong mga proyekto.
Gipasalamatan usab ni Guanzon si Governor Juliette Uy sa pagdawat ug pagpaminaw sa proposal sa FTI ingon man sa koordinasyon nga nahimo tali sa ahensya ug sa probinsyal nga panggamhanan. Gilauman nga pinaagi sa maong koordinasyon, mas mapalig-on ang suporta sa sektor sa agrikultura ug pangisdaan nga makatabang sa pagpanalipod sa produkto ug panginabuhian sa mga mag-uuma ug mangingisda sa lalawigan.
By: Jane Salimbao/PIO
Hulagway kuha ni: Jez Ecuacion/PIO
