COVID-HURT MAKE-UP ARTISTS SA CDO, NAAYUDAHAN

Posted: July 2, 2020

272020-6

LAKIP ang industriya sa make-up arts ug event organizing ang labing naapektahan sa krisis nga resulta sa hulga sa coronavirus disease 2019. Apan wala mawad-an sa paglaum ang make-up artists sa Misamis Oriental ug Cagayan de Oro human sila naayudahan pangagamhanan sa Misamis Oriental ubos sa liderato ni Gov. Bambi Emano.
Mahinumduman nga niadtong milabay nga semana, Hunyo 16, 2020, gidawat sa Project Hair and Make-Up Artists (# ProjectHMUA) ang balor P25,000 nga cash assistance gikan kang Gov. Emano kauban si Provincial Tourism Officer Atty. Jeffrey Saclot. Ang Project HMUA proyekto sa make-up artists sa lalawigan ug dakbayan nga nagkalisod intawon sa panginabuhi tungod sa COVID-19 pandemic.
Niadtong Hunyo 19, gi apod-apod ang hinabang ngadto sa kapin gatus ka miyembro sa nasangpit nga grupo. Gani, ikaunom na kini nga higayon nga sila naayudahan sukad mibuto ang problema sa makamatay nga virus.
Pinaagi sa Facebook post, Nagpaabot ang grupo sa #ProjectHMUA sa ilang dakung pagpasalamat kay Gob. Bambi Emano ug kang Provincial Tourism head, Atty. Jeffrey Saclot sa ilang gihatag nga pagsalig ug supporta hilabi na sa ilang nadawat nga tabang pinansyal.