GIBUTYAG ni PNP-Police Regional Office 10 Regional Director PBGEN Christopher N. Abrahano nga mikunhod ang ihap sa crime statistics sa rehiyon 10. Kini human gikan sa 2,026 nga ihap niini sa Enero hangtud Nobyembre sa tuig 2024, miubos kini ngadto sa 1,673 karong tuiga kon asa miabot sa 353 ang pag ubos kon 17.42%.

Matud ni RD Abrahano, naangkon kini nga kalampusan gumikan sa paningkamot sa mga kapulisan sa tibuok rehiyon 10. Sulti ni Abrahano nga ang ang most prevalent crimes sa rehiyon gilangkoban sa theft ug rape apan matud niini nga mikunhod kini pag-ayo ug nagtinguha nga mas muubos pa ang ihap sa shooting incidents, murder ug crimes against properties hilabina karong panahon sa kapaskuhan.

Mapasalamaton kini kang Governor Juliette Uy tungod sa tanang suporta niini sa lupon sa kapulisan labina sa Misamis Oriental Provincial Police Office. Nagtuo si RD Abrahano nga dako ang papel sa panaghiusa sa mga Local Government Units ug sa mga kapulisan hilabina sa crime prevention ug nakaamgo nga pinaagi niini muubos sa hingpit ang krimen.

Gipadayag niini nga mas pahugtan pa ang ilang operasyon pinaagi sa ilang police visibility ug sigurohong dili lamang makita kondili mabati usab sa katawhan ang seguridad. Subay kini sa gipahigayong Regional Peace and Order Council-10 Reorganizational Meeting for CY 2026-2028 nga gipangunahan ni RPOC 10 Chairperson Camiguin Provincial Governor Hon. Xavier Jesus D. Romualdo.

Misalmot isip representante ni Governor Juliette T. Uy si Provincial Jail Warden Retired Police Major Rogelio Labor Jr. kauban si Provincial Disaster Risk Reduction Officer Mr. Fernando Vincent Q. Dy Jr. Usa ang kahusay ug kalinaw sa gipaningkamotan ni Governor Uy nga maangkon sa probinsya sa tinguha nga masigurong luwas ang katawhan samtang muuswag ang ekonomiya sa lalawigan.

By: Jane Salimbao/PIO

Hulagway kuha ni: Marvin Gilig/PIO