DUGANG suporta na usab ang gitunol sa Kapitolyo Probinsyal ug sa LGU -Lagonglong ngadto sa mga eskwelahan sa Munisipalidad sa Lagonglong atol sa pagtapos sa Brigada Eskwela 2021 nga gipahigayon sa Lagonglong Central School adlawng Huwebes, Septiyembre 29, 2021.

Ang kalihukan gitambungan ni Gobernador Bambi Emano pinaagi sa zoom, samtang ang kalihokan personal nga gipangunahan nila Lagonglong Mayor Jay Albert Puertas, Lagonglong Vice Mayor Marita Ramonal, Gingoog City Vice Mayor Peter Unabia, Lagonglong Public Schools District Supervisor Dr. Joel Jayme, Misamis Oriental GPTA President Eric Mabelin, Municipal Councilors sa Lagonglong, Lagonglong School Heads, ug mga magtutudlo gikan sa mga nagkalainlaing eskwelahan sa Lagonglong.

Gitunol ngadto sa Dep-Ed Lagonglong District ang 5 ka unit sa Epson L15150 Printer, 1 unit sa laptop, mga bond paper, ug mga disinfectant.

Kini na mga materyal gitunol aron suportahan ang mga magtutudlo sa ilang pagmugna og mga modyul atol sa new normal learning modality.

Gawas niini, nihatag usab si Gobernador Bambi Emano ug ₱5,000,000.00 ngadto sa LGU Lagonglong, samtang naghatag ug mga pintal si Gingoog City Vice Mayor Peter Unabia.

Nakadawat usab ug ₱40,000.00 ang matag public school sa Lagonglong aron dugang pondo sa pag-ayo ug pagpanindot sa ilang tagsa-tagsa ka mga lawak sa tunghaan.

Sulod sa siyam ka tuig nga pagdumala ni Governor Bambi sa Local School Borad sa lalawigan, kanunay niini gi-implementar ang mga programa sa pagpalambo sa sektor sa edukasyon, sa laraw nga matabangan ang mga Misamisnon nga matapos ang ilang pagtungha aron matuman ang ilang mga pangandoy sa kinabuhi.

(HULAGWAY KUHA NI MARVIN GILIG/PIO)