DUL-AN 300 STRANDED OFWS, LSIS NAKAPAULI NA’S MISOR

Posted: June 3, 2020

362020-1

DUL-AN 300 ka stranded overseas Filipino workers (OFWs) ug Locally Stranded Individuals (LSIs) ang nakapauli sa Misamis Oriental sukad Mayo 25 hangtud Mayo 31, 2020. Nahimo kining posible tungod sa paningkamot sa Provincial Task Force for COVID-19 sa pagpangulo ni Task Force chief Dr. Jerie Calingasan, ug sa hangyo ni Gov. Bambi Emano nga dili gayud sila pasagdan magdugay pa sa Luzon o bisan asang dapit kung diin dunay kompirmadong local transmission sa coronavirus disease 2019.
Mikabat sa 262 ka OFWs ug 37 ka LSIs ang malampuson nga nakapauli sa lalawigan human ma-kompleto ang rekisitos ug uban pang dokumentaryo sa ilang byahe pauli.
Kaabag sa Task Force ang Department of Tourism – Region 10, Overseas Workers Welfare Administration – Region 10, Civil Aviation Authority of the Philippines, local chief executives sa 23 ka lungsod ug duha ka dakbayan sa Misamis Oriental, Provincial Health Office ug Public Employment Services Office (PESO).
Si Atty. Jeffrey Saclot, ang tigpamaba sa Interagency Task Force on Emerging Infectious Diseases sa Misamis Oriental, nagkanayon dili tiaw ang screening ug profiling sa returning stranded individuals, lakip na ang 14-day mandatory quarantine sa mga Barangay Isolation Units (BUIs) una pa sila nakapauli sa ilang tagsa-tagsa ka pamilya.