E-HEARING DAKO OG TABANG SA DECONGESTION SA MOPJ

Posted: August 13, 2020

13082020-6

DAKO og gikatabang nga mapadali ang pagdungog sa mga kaso sa mga piniriso sulod sa Misamis Oriental Provincial Jail (MOPJ) mao ang E-Hearing kon diin gipaagi na sa online ang pagdungog sa kaso sa mga piniriso.

Kini ang gipahibalo ni MOPJ Jail Warden Dominador Tagarda kon diin pipila na nakagawas nga mga piniriso sa MOPJ.

Gikan sa Hulyo 1 hangtod Agusto 10, miabot na sa 82 ang napagawas nga mga piniriso pinaagi sa release order nga gikan sa nagkalain-laing korte sa Cagayan de Oro ug Misamis Oriental.

“Nagalaom kami nga sa mga sunod nga mga adlaw duna pay daghan nga mogawas aron makunhuran ang kinadaghanon nga mga piniriso karon dinhi nga mikabat na sa hapit na mag 500,” matud ni Tagarda.

Dako man og tabang ang E-Hearing apan anaa sab gihapon ang personal appearance depende sa madesisyunan sa korte.

Anaa gihapon ang Public Attorney’s Office (PAO) o mga private lawyer nga mobisita sa ilang kliyente nga mga piniriso aron paspas nga malihok ang ilang mga kaso.

Niining limitado ang lihok gumikan sa pagbantay sa makamatay nga virus gisiguro sa buhatan sa MOPJ nga magbaton gihapon sa Social o Physical distancing, mag sul-ob ug face masks ug sa uban pang mga health protocol nga kinahanglan tumanon aron luwas gihapon ang mga piniriso lakip ang kinsa nga mobisita nga mga abugado.

Ang MOPJ padayon sa pagpatuman sa E-Dalaw kon hain gidid-an usa nga pisikal nga makabisita ang pamilya sa priso ug diha na lamang usa sa online ang ilang panagstoryahanay.