Malampuson nga gipahigayon sa Lungsod sa Villanueva ang Family Planning Month Celebration ubos sa tema “Tara, Usap Tayo sa Family Planning.” Usa sa nag-unang serbisyo nga gitunol sa mga kababainhan mao ang libre nga insertion sa Progestin-only Subdermal Implant ug libre usab nga pagtanggal alang sa mga gusto magpatanggal niini. Gitambongan kini sa kapin 30 ka benepisyaryo nga may dakong pagpasalamat sa programa.
Gipangulohan kini ni Provincial Population Officer, Mr. Andrew L. Gapuz, MLG nga mitataw nga ang family planning dili pagpatay sa kinabuhi sa bata, kundili usa kini ka paagi aron mapugngan ang fertility nga maoy hinungdan sa pagburos ug matabangan ang mga pamilya sa hustong pag-manage sa pagpanganak. Kadaghanan sa mga nakabenepisyo mao ang mga lumulopyo sa Villanueva, apan adunay usab mga kababayen-an gikan sa kasikbit nga lungsod nga miduol sa maong serbisyo. Usa sa mga benepisyaryo si Angelica Tagalog, residente sa Dayawan, Villanueva, nga midesisyon nga magpabutang sa implant tungod sa kalisod sa panahon ug kamahal sa palitonon.
Gikalipay usab sa Municipal Population Officer sa Villanueva, Ms. Romelyn Nonot, nga naapil ang ilang lungsod sa napiling destinasyon sa programa. Dugang pa ni Mr. Gapuz, aduna pay nakaschedule nga parehas nga kalihokan sa ubang lungsod sa Misamis Oriental aron mas daghan pa ang matabangan. Kini nga inisyatibo gipakita nga seryoso ang probinsyal nga liderato sa pagtubag sa panginahanglan sa kababainhan ug pamilya.
Ang kalihokan suportado mismo ni Governor Juliette Uy, nga padayon nga naningkamot aron matabangan ang mga Misamisnon sa maayong kahimsog, kalambuan, ug kalidad nga serbisyo sa publiko.
By: Keen John Pacaldo/PIO
Hulagway kuha ni: Marvin Gilig/PIO
