FISH FEEDS, GI APOD-APOD SA GINGOOG CITY

Posted: May 21, 2020

2152020-5

ISIP dugang kapangitaan ug pagkaon dinhi sa Misamis Oriental, mitunol sa fish feeds ang Provincial Agriculture Office (PAGRO) ngadto sa mangingisda sa Brgy. Lunotan, Gingoog City. Kini, human hugot nga gimando ni Gov. Bambi Emano aron masiguro nga dili kita mahutdan sa presko, tambok ug sustansiyado nga isda ning panahon sa krisis.
Gihimo ang pag-apod apod sa PAGRO Fisheries division niadtong Abril 25, 2020, kung diin gidawat sa Lunotan Group of Farmers Association nga adunay 52 ka miyembro ang 24 ka sako sa fish feeds.
Lipay uyamot ang mga benepisyaryo nga nagpaabot sa ilang dakung pasalamat kang Gov. Emano sa iyang kaikag nga motabang sa mga gagmay’ng grupo sa mangingisda.
“Daghan kaayong salamat kang Governor Bambi Emano nga maoy naghatag sa maong proyekto dako kaayo ni nga tabang sa mga mag-uuma nga pareha namo,” sulti pa ni Maria Cristina Lorenzo ang presidente sa Lunotan Group of Farmers Association.
Una nang nakadawat ug tag 2,500 ka tilapia fingerlings ang nagkadaiyang asosasyon sa mangingisda dinhi sa Misamis Oriental, hilabina niadtong nanimuyo daplin sa kabaybayonan.