FOOD PRODUCTS SA MISOR, HIGHLIGHT SA KASAULOGAN SA TOURISM WEEK

Posted: September 27, 2019

70539552_441891986421825_5032389691547058176_o

GISUGDAN na niadtong Lunes, Setyembre 16, 2019, ang kasaulogan sa Tourism Week, kung diin ang nahimong highlight ang mga produktong pagkaon nga gama sa mga molupyo sa lalawigan sa Misamis Oriental.

Bisan si Provincial Tourism Officer Atty. Jeffrey Saclot hilabihan usab ang pagpaila ug pagpatilaw sa mga lamiang pagkaon nga naka-display sa “Tienda sa MisOr” sa may activity center sa Centrio Ayala Mall sa dakbayan sa Cagayan de Oro. Gikan sa suman, bibingka, biko dukot, ug uban pa, hala gayud sa panghinambog ang tourism official.

Gikalipay pa ni Atty. Saclot ang partisipasyon sa mga kalungsuran ug dakbayan sa Misamis Oriental sa tibuok semana nga kasaulogan.

“Every municipality naay gina-showcase, gina-display nga food products, aron makita sa tibuok katawhan nga mubisita sa Centrio Ayala Mall nga kong unsa ang mga lami nga mga pagkaon gikan sa lalawigan nga pwede pa gyud mahimong pasalubong,” matud ni Atty. Saclot.

Bisan sa wala pa magsugod ang Tourism Week, daghan nang excited kaayo nga mosaksi ug nangutana kung kanus-a magsugod ang food exhibit.
“Daghan ga-inquire kung kanus-a magsugod ang exhibit, because they want to visit…they want to buy products from the exhibitors. And, I’m very much sure that some of the food products gina-display dinha sa exhibit, gihimo sa atong kaigsuonan gikan sa kabukiran,” niya pa.

Ang “Tienda sa MisOr”, mahuman hangtud pa sa adlaw’ng Biernes, Setyembre 20, 2019, maoy kalihukan nga gipatuman ni Gobernador Bambi Emano matag saulog sa Tourism Week, sa katuyoan nga mapasigarbo ang mga makatulo-laway nga lamiang pagkaon nga gama intawon sa atong kaigsuonan sa lalawigan sa Misamis Oriental.