GENERAL COMMUNITY QUARANTINE SA MISOR, POSIBLENG MA-EXTEND

Posted: April 27, 2020

93971812_593869877890701_3063572744575647744_n

POSIBLENG ma-extend pa ang General Community Quarantine dinhi sa Misamis Oriental kung ugaling makita sa Provincial Task Force for COVID-19 nga gikinahanglan. Pito na lang ka adlaw ayha ang April 30 deadline aron hinay-hinay nang makabalik sa normal ang sitwasyon sa panginabuhi sa katawhan.

Tungod niini, gitapok ni Gov. Bambi Emano ang mga mayores sa 23 ka lungsod ug duha ka dakbayan sa lalawigan, kauban ang ilang health officers aron hisgotan kung mag-extend sa General Community Quarantine o dili na. Wala pay igong desisyon nga mitumaw. Sa pagka karon, wala pay desisyon nga gipakanaug sa grupo tungod sa daghang isyu nga angay konsiderahon api na niini ang pag “modified” sa GCQ.

Kini gipahigayon sa may Phividec compound sa lungsod sa Tagoloan, Abril 22, 2020, sa pagpangulo ni Dr. Jerie Calingasan, ang task force chairperson. Didto nakatambong usab si Police Senior Superintendent Robert Roy Bahian, ang Provincial Police Director sa Misamis Oriental, isip co-chairman.

Kung ugaling malugwayan, hangyo sa mayores nga unta tabangan sila sa pagpakaon sa katawhan, ug unta, ang mga Executive Orders na lang ni Gov. Emano ang sundon sa tanan, aron dili na malibog ang mga tawo kon ahay tumanon nga mga kasugoan.

Aron adunay hiniusa ug hapsay nga desisyon kabahin sa extension, gipaagi ni Gov. Emano sa botasyon. Dunay 14 ka boto gikan sa MHO ug sa mga mayores ang mibotar pabor sa extension. Hinuon, gipasalig ni Gov. Emano nga andam kini mangita’g paagi aron dili magutman ang katawhan, aron lamang gayud makab-ot ang paningkamot nga mahimong luwas ang lalawigan gikan sa pagtakboy sa coronavirus disease 2019. Kinahanglan lamang ang kooperasyon sa tanang opisyales sa lungsod, dakbayan ug kabaranggayan aron dili kita magutman, ug sa mas daling panahon, mobalik na sa normal ang panginabuhi ug pagpakabuhi sa tanang residente sa lalawigan.