GOV. BAMBI, MAPASALAMATON SA NMMC

Posted: June 22, 2020

22062020-28

NAGPAABOT sa iyang dakung pasalamat sa tanang medical practitioners ug hospital staff sa Northern Mindanao Medical Center (NMMC) si Gov. Bambi Emano sa ilang dedikasyon ug sakripisyo ning panahon sa pandemya. Matud sa gobernador, angay silang pasalamatan sa paghalad sa ilang kinabuhi bugti sa pagluwas sa kinabuhi sa uban.
Sulti ni Gov. Emano, mga doktor, nars, office staff, attendants hangtud na sa driver ug janitors, wala igsapayan ang risgo nga ilang giatubang matag adlaw sa pag-atiman sa tanang pasyente 24 oras matag adlaw, hilabina niadtong nataptan intawon sa coronavirus disease 2019 gikan sa nagkalain-laing lugar sa Rehiyon 10.
Imbes mahadlok ug maglikay nga matakboyan, sila ang nahimong bayani karon nga maisugon sa pag-atiman sa mga pasyente nga nagkinahanglan kaayo sa ilang serbisyo, lakip na sa walo ka Misamis Oriental Provincial Hospital (MOPH) sa probinsya.
Kampante si Gov. Emano nga pinaagi kanila, lakip sa mga frontliners sa entero 23 ka lungsod ug duha ka dakbayan sa lalawigan, ug sa maisugon nga pagpatuman ni Provincial Task Force for COVID-19 chief Dr. Jerie Calingasan, magpabiling luwas sa pagtakboy ang katawhan sa Misamis Oriental.