GOV. BAMBI, NAGPAABOT OG MENSAHE ATOL SA 122nd INDEPENDENCE DAY

Posted: June 22, 2020

22062020-10

ANG atong frontliners, kinsa maoy hinungdan kon ngano nagpabiling luwas ang Misamis Oriental gikan sa pagtakboy sa coronavirus disease 2019 hangtud ning panahona, maoy angay saludohan ug pasalamatan tungod sa paghalad sa ilang kinabuhi aron kita makalingkawas ug mabuhian sa pagka-ulipon sa kahadlok sa pagtakboy sa makamatay nga sakit.
Kini ang mensahe ni Gov. Bambi Emano atol ning pagsaulog sa ika-122 adlaw sa kagawasan sa Pilipinas, Hunyo 12, 2020. Matud sa gobernador, susama sa atong mga bayani nga nangamatay tungod sa pakigbisog batok sa mga manlulupig, ang atong frontliners angay usab panaminan ug himuong inspirasyon ning makabag-o nga panahon.
Dili matud pa tiaw ang sakripisyo sa frontliners sa ilang pagpadaplin sa personal nga kaluwasan hilabina sa ilang mga pamilya ug mga anak, apan giuna pa ang uban pagluwas gikan sa kaalautan.
Nanghinaut na lamang si Gov. Bambi Emano nga unta magpadayon ang pagsalig ug kooperasyon sa kinabag-an ngadto sa atong mga frontliners nga nagbudlay ug naghago aron maangkon ang luwas nga Misamis Oriental gikan sa COVID-19.