GOV. BAMBI UG PHO MILAMPOS SA IHLGP

Posted: August 3, 2020

382020-2

MALAMPUSON nga mitapos si Governor Bambi Emano uban ang Provincial Health Office sa Institutionalization of the Health Leadership and Governance Program (IHLGP).
Ang IHLGP usa ka programa sa Department of Health (DOH), United States Agency for International Development (USAID) ug sa Zuellig Family Foundation nga nagtumong nga mapalambo ang kinatibuk-ang natad sa kahimsog sa panglawas.
Adlaw nga Miyerkules, Hulyo 29, 2020 usa ka programa ang gipahigayon sulod sa Provincial Training Center aron isaulog ang malampusong kahumanan ni Governor Bambi ug sa Provincial Health Office ubos sa pamunuan ni Dr. Jerie Calingasan sa IHLGP.
Tumong sab niining maong programa ang pagpalambo sa kahimsog sa panglawas, kahimsog sa mga inahan ug mga bata, pagplano sa pamilya, ug tuberculosis pinaagi sa pagpalambo sa kapasidad,pagdumala ug sa kapabilidad sa mga lokal nga pangagamhanan ug sa mga lokal nga kawani sa panglawas.
Tuig 2018 gisugdan sa amahan sa lalawigan ang pagtambong sa IHLGP ug sa way puas nga kakugi malampuson kining nahuman karong tuiga.
Ang kalampusan ni Governor Bambi sa maong programa subling nagpamatuod sa iyang determinsayon nga mas ipalambo ang kahimtang sa panglawas sa mga Misamisnon.
Ang Zuellig Family Foundation ug ang USAID nagpadayag sa ilang dakong pahalipay sa probinsya sa Misamis Oriental ug sa ilang pagsalig nga ubos sa liderato ni Governor Bambi kay magamit gayud og maayo ang mga leksyon ug kaalam nga natudlo gikan sa maong programa.
Nagpamatuod niini ang walo ka modernong balay tambalanan sa lalawigan ug ang kaandam sa pakigbatok sa Corona Virus Disease (Covid-19) ubos sa pagdumala ni Governor Bambi uban ni Dr. Jerie Calingasan isip Provincial Task Force for Covid-19 chief.