GOV. EMANO, GISIGURO NGA STABLE ANG PANUDLANAN SA KAPITOLYO

Posted: May 27, 2020

27052020-2

GIPANIGURO ni Gov. Bambi Emano nga lig-on ang panudlanan karon sa kapitolyo probinsiyal sa Misamis Oriental taliwala sa nasinating krisis tungod sa hulga sa coronavirus disease 2019 (COVID-19).
Matud sa gobernador, dili tiaw ang wala ug tuo nga pag-apod apod sa pundo sa nagkadaiyang hugpong sa probinsiya isip hinabang alang sa ilang panginabuhian.
Prayoridad karon sa pamunuan ni Gov. Emano ang sektor sa agrikultura ug kooperatiba alang sa iyang economic recovery program base na usab sa rekomendasyon ni Provincial Task Force for COVID-19 chief Dr. Jerie Calingasan.
Kung kaniadto pagpungko ni Gov. Emano sa kapitolyo sa tuig 2013 nakasinati kini og hilabihan nga kalisod sa pundo tungod sa gibilin kaniya nga utang nga mikabat sa P1.2 bilyones, karon nakabawi na ang panudlanan, hinungdan nga gaan lamang kaniya ang pagtunol og pundo sa nagkadaiyang organisasyon nga moduol sa iyang buhatan.