GOV. EMANO, MITUNOL OG GAMIT SA FRONTLINERS SA 15 CHECKPOINTS, OSPITAL

Posted: April 23, 2020

93794826_587186418559047_5791984430557954048_n

GITUBAG ni Misamis Oriental Governor Bambi Emano ang bisan unsang panginahanglanon sa mga health workers ug frontliners aron makigbatok sa Corona Virus Disease (Covid-19) dinhi sa lalawigan.

Dunay face masks ug uban pang personal protective equipment (PPEs) ang gitunol ni Gov. Emano ngadto sa mga medical frontliners sa mga balay tambalanan, lakip kasundalohan, kapulisan, force multipliers ug volunteers sa 15 ka mga community checkpoints sa lalawigan.

Matud sa gobernador dili tiaw nga nagtukaw 24 oras ang frontliners ug gihalad ang ilang kinabuhi aron lang sa kaluwasan sa tanan, butang nga dili gayud mabalibaran sa ilang panginahanglan.

Gikan sa PPEs hangtud na dayon sa ilang pagkaon sa pamahaw, paniudto ug panihapon, gipahatud ni Gov. Emano sa mga ospital ug checkpoints. Duna pay disinfectant misting tent nga gibutang ang gobernador aron sa ilang pagpauli dili sila hadlok nga makatakod sa ilang minahal sa kinabuhi.