GOV. EMANO, NAKIG-ALAYON SA NAGKALAIN-LAING ORGANISASYON BATOK COVID-19

Posted: April 23, 2020

92045319_579985785945777_4760080153571229696_n

DILI tiaw nga paningkamot ni Gobernador Bambi Emano sa pagpakigbatok sa posibleng pagtakboy sa coronavirus disease 2019 (COVID-19) dinhi sa Misamis Oriental. Gani, nakig-alayon pa kini sa nagkadaiyang institusyon ug organisasyon aron masiguro nga luwas gayud ang katawhan sa lalawigan batok sa makamatay nga sakit.

Pinaagi sa round-table discussion via teleconference ning bag-o, nagkahisgot sila si Gov. Emano, Zuellig Family Foundation, Alliance for Improving Health Outcomes (AIHO), Philippine Society of Public Health Physicians (PSPHP) ug Foundation for Family Doctors, sa mga lakang pagpalig-on sa depensa hilabina sa tanang frontliners batok sa killer virus.

Kauban sa gobernador sa panaghisgot sila si Provincial Health Officer Dr. Jerie Calingasan, PHO Chief of Operations Rosette Cervantes, ug Provincial Tourism Officer Atty. Jeffrey Saclot.

Tema sa virtual conference mao ang “strengthening the frontliners for LGU preparedness and response” nga gikalipay og maayo ni Gov. Emano tungod sa mga bag-ong paagi aron masiguro nga walay mahitabong local transmission sa COVID-19 samtang wala pay bisan isa ka kaso niini dinhi sa Misamis Oriental.

Sa pagka karon, wala pa gipubliko ang ilang nasabotang mga lakang, samtang nagpadayon pa ang general community quarantine dinhi sa lalawigan.