SULOD sa unang pulo ka bulan ni Gov. Juliette T. Uy, padayong gihingusgan ang pagpatuman sa tinuoray nga panerbisyo. Kini ang unod sa mensahe sa gobernadora atol sa ika-18 nga sinemanang pagpakayab sa nasudnong bandila sa kapitolyo, adlawng Lunes – Mayo 4, 2026.

Dako ang pagtoo ni Gov. Uy nga dili lang taman sa plano apan aksyon gayod ang gikinahanglan aron makab-ot ang daghanang kalamposan kung asa ang resulta niini mao ang usa ka progresibong Misamis Oriental. Usa sa gihatagan hibug-aton mao ang pagpahugot sa national partnerships aron masiguro ang dugang pondo alang sa mga programa ug proyekto. Bag-ohay lang, mabulokon ang opisyal nga lakaw dadto sa kaulohan sa inahan sa lalawigan uban ang pipila ka mga ulo sa departamento.

Sulti ni Gov. Uy nga dunay gilaumang dugang mga medical equipment nga mahatag sa mga balay tambalanan ning probinsya. Sama sa mga Ambulance, XRay machines ug pang- ultrasound. Lakip niini ang Dialysis equipment nga dakong tabang sa pag-siguro sa maayong panlawas sa katawhan. Dugang usab niini nga wala siya’y laing tumong kundili ang mahatod sa katawhan ang tanang gikinahanglan. Positibo usab ang inahan sa lalawigan sa dakong suporta sa mga lideres sa nasyonal. “Ang pagpaningkamot walay daghan istorya. Just do your best to serve the people of the province of Misamis Oriental”, asoy ni Gov. Uy. Bisan sa mga pagsulay sa pagsugod pa lang sa iyang pangatungdanan isip gobernador sa Mis Or, wala nahimong babag aron matubag ang mga yangungo ug masolusyonan ang mga kakulangon.

Kahinumdomang ang labing tumong ni Gov. Uy mao gayod ang walay makalimtan nga sektor sa katilingban apan mahatag ang insaktong kaayohan sa kinatibuk-an.

Hulagway kuha nila: Andy Pacamalan/PIO & PIO Intern John Miko Amper