GIDASIG ni Governor Juliette T. Uy isip chairperson sa Social Development Committee ubos sa Regional Development Council- 10 ang tanan alang sa malungtarong pagpalambo sa tanang social development programs pinaagi sa pagtinabangay. Gipadayag niya kini atol sa 1st quarter Regional Development Council-10 Social Development Committee Meeting, adlawng Hwebes – Pebrero 26, 2026. Sulti ni Gov. Uy nga mahinungdanon kaayo ang maong panagtapok sa labing rason nga malatid ug mauyonan ang gikinahanglang mga lakang sa pag-implementa sa nagkadaiyang proyekto alang sa kinatibuk-ang pag-uswag sa tibuok Northern Mindanao.

“As we move forward in this dynamic year of 2026, let us reaffirm the values that define meaningful public service – malasakit, integridad, ug panaghiusa”, dugang mensahe sa gobernadora. Ang maong higayon gitambongan sa mga kadagkoan gikan sa nagkadaiyang agency regional offices. Kung asa ang matag usa gipadayag ang mga budget proposals alang sa sunod tuig 2027. Nagmabungahon usab kini pinaagi sa gilatid nga mga regional budget proposals gikan sa CHED ug state universities & colleges. Lakip gihisgutan mao ang pag-rekognisa sa Regional Technical Education and Skills Development Committee isip sub-committee, 2025 Interim Northern Mindanao Regional Development Report: Social Sector Chapters/Sub-Chapters ug ang status update sa FY 2026 RDC-10 endorsed budget proposals.

Samtang si RDC 10 – SDC Vice Chairperson Jaime Rafael U. Paguio ang natahasang presiding officer. Uban niini nga mitambong sa tigom ang nagkadaiyang Social Development Sector Agency Regional Offices (AROs), Government Owned and Controlled Corporations (GOCCs), State Universities & Colleges (SUCs), ug uban pang Government Instrumentalities. Panghinaot gayod ni Gov. Uy nga walay mahikalimtang sektor nga matabangan alang sa hiusang pagsagubang sa tanang hagit ug ang pagkab-ot sa maayo ug progresibong kabag-ohan.

By: Rejiann Ammor R. Maygay/PIO

Hulagway kuha ni: Jezreel Ecuacion/PIO