ESPESYAL nga nakigtigom og naghimo og konsultasyon si Governor Juliette Uy uban sa mga Chief of Hospitals sa walo ka Misamis Oriental Provincial Hospitals (MOPH) aron hisgutan ang mga suliran ug prayoridad nga panginahanglanon sa mga ospital sa lalawigan. Lakip sa gihisgotan ang dugang mga personahe ug nurses, infrastructure developments, pagpaayo sa mga pasilidad ug mga kagamitan sama sa dialysis facilities ug generators ug modernong medical equipment.

“Tanang butang atong pangitaan og pamaagi,” matud pa sa gobernadora samtang iyang giawhag ang mga doktor nga ipadayag dayon ang dagko man o gagmay nga problema aron matubag kini sa labing dali nga panahon. Mapasalamaton si MOPH-Initao Dr. Iris Ratunil sa pagpaminaw sa gobernadora sa ilang mga hangyo ug mga suliran sa ospital. Matud niini, dako ang kabag-ohan nga mahimo niini sa unahan gumikan sa panaghiusa, konsultasyon ug suporta sa Panggamahang Probinsyal. Lakip sa mga prayoridad nga programa ni Gov. Uy mao ang pagpatukod og eye centers sa matag distrito aron matabangan ang mga kabus nga adunay problema sa mata. Gusto usab niyang mapalig-on ang serbisyo alang sa mga batang adunay skin problems ug ang pag-establisar og cancer facilities sa lalawigan.

Tumong sa gobernadora nga matagbaw ang katawhan sa mga quality health care services ug makabaton og maayong panglawas ang matag pamilya sa probinsya.

By: Jane Salimbao/PIO

Hulagway kuha ni: Charm Andy Pacamalan/PIO