GITAMBUNGAN mismo ni Governor Juliette U yang gipahigayon nga Mindanao Partners Forum and Landscape Workshop adlawng Miyerkules – Pebrero 4, 2025 sa Seda Hotel Dakbayan sa Cagayan de Oro. Tumong sa kalihokan ang paghatag og dugang pagsabot sa kahimtang sa mga landscape sa tibuok Mindanao. Lakip na niini ang mga hagit ug opurtunidad sa kinaiyahan, agrikultura, klima ug panginabuhian sa tibuok Mindanao. Sa kalihokan gibutyag ni Governor Juliette Uy ang iyang dakong pasalamat sa mga nag-organisa sa kalihokan. Matod pa niini dako kaayo ug papel ang maong forum sa pagpalig-on sa panaghiusa tali sa lokal nga kagamhanan ug private sektor partners aron mapalambo ang mga programa alang sa pagsaka sa ekonomiya ug pagpanalipod sa kinaiyahan.
Dugang pa sa Gobernador nga ang lalawigan nagpadayon sa pagpanguna sa mga inisyatiba nga may kalabotan sa climate resilience, sustainable agriculture ug food Security sa lalawigan ug kini iyang pagapunduhan og budget. Dako usab ang pasalamat ni Vice Chairperson and Executive Director Climate Change Commission Sec. Robert E.A. Borje kang Governor Juliette Uy sa paghatag higayon sa pagtambong sa kalihokan ug ang paghatag inisyatiba nga mga programa ug suporta dili lamang sa lalawigan sa Misamis Oriental lakip na sa tibuok Mindanao. Ang Mindanao Partners Forum and Landscape Workshop giila isip usa ka lakang sa pagtinabangay sa tanan sector nga mapalig-on ang hiniusang Mindanao padulong sa malungturong kalambuan nga maghatag og dugang kaayohan sa kasamtangan ug umalabot nga mga henerasyon.
By: Ellen Mae Lahinao/PIO
Hulagway kuha ni: Charm Andy Pacamalan/PIO
