GIMANDOAN ni Governor Juliette Uy ang pipila sa mga buhatan sa Kapitolyo Probinsyal nga inspeksyonon ang Don Gregorio Pelaez Sports Complex alang sa planong rehabilitation niini. Matod ni Provincial Risk Reduction and Management Officer Fernando Vincent Dy, tinguha ni Governor Uy nga himuong mas presentable ug safety ang sports complex pinaagi sa pakigtimbayayong sa lokal nga kagamhanan sa Cagayan de Oro. Gitumbok ni Dy nga risgo sa kalawasan sa tao ang kagamitan sa sports complex, labina ang atop niini nga adunay asbestos. Matod niya nga karaan na ang mga kagamitan niini ug gikinahanglan na nga bag-uhon aron malikay ang katawhan sa mga disgrasya. Ang asbestos usa ka klase nga mineral nga ginagamit para mag mugna og mga fireproof nga materyales, apan makahatag kini sa sakit nga cancer kung maginhawa-an kini.
Samtang gidugang ni Dy nga magmugna og proposal ang Kagamhanang Probinsyal sa LGU Cagayan de Oro nga bag-ohon ug dugangan sa mga bag-o nga pasilidad. Nangulo ang Provincial Risk Reduction and Management Office (PDRRMO) ug Provincial Engineering Office (PEO) sa inspeksyon niadtong Pebrero 5, 2025. Gilauman sa mga opisyales sa Kagamhanang Probinsyal ang koordinasyon sa LGU Cagayan de Oro, aron masugdan kini sa daling panahon.
Usa kini sa mga lakang ni Governor Juliette Uy nga hatagag pagtagad ang kalawasan sa katawhan aron malikay sila sa mga balatian. Prayoridad ni Governor Uy hisgutanan sa panglawas sa katawhan nga maoy usa sa mga pundasyon sa BANGON strategic direction.
By: Nefilim Diaz/PIO
Hulagway kuha ni: Charm Andy Pacamalan/PIO
