HUGOT nga gisuportahan karon sa Panggamhanang Probinsyal pinaagi ni Governor Juliette Uy ang mga fisherfolks association sa lalawigan. Gani, niadtong Disyembre 16, 2025, malampuson nang naani sa bangus growers gikan sa Barangay Lunao, Gingoog City ang ilang mga produkto. Moabot sa walo ka tonelada ang malampusong naani gikan sa Norwegian fish cage nga gi-operate ni Municipal Agriculture and Fisheries Council nga si Mr. Domingo Junio.
Nahimo kining posible human gisuportahan sa gobernadora ang mga fisherfolks pinaagi sa libreng fish feeds kon bahug ug uban pang materyales aron mapauswag ang produksyon sa isda. Lakip usab sa inisyatiba sa kagamhanan ang pagtabang nga makabaligya sa ilang produkto direkta ngadto sa mga local buyers, cooperatives ug negosyante aron masiguro ang mas hapsay ug patas nga pagbaligya sa ilang ani pinaagi sa market linkage initiatives sa pagpanguna ni Provincial Agriculture Office Senior Agriculturist Ms. Michelle Ross Lace.
Tumong sa programa nga mapalambo ang kita sa mga mananagat, mapalig-on ang ilang organisasyon ug masiguro ang kalig-on sa panginabuhian sa komunidad. Dako ang pasalamat ni Junio kang Governor Uy tungod sa suporta nga ilang nadawat hilabina sa tabang sa feeds ug pagtabang nga mabaligya ngadto sa kamerkadohan ang ilang mga produkto nga bililhon aron mapadayun ug mapalapad ang ilang panginabuhian.
Magpadayun pa ang programa isip kabahin sa tinguha sa gobernadora nga mapauswag ang agrikultura ug pangisdaan samtang makahatag og lig-on nga panginabuhian ang mga mananagat sa probinsya.
By: Jane Salimbao/PIO
Hulagway kuha ni: Marvin Gilig/PIO
