SUPORTADO ni Governor Juliette Uy ang imbitasyon karon sa Oro Chamber kon Cagayan de Oro Chamber of Commerce and Industry Foundation, Inc. alang sa ilang umalabot nga kalihokan. Kini human mahimong host ang Oro Chamber alang sa 35th Mindanao Business Conference (MinBizCon) karong umalabot Agosto 11-13, ning tuiga nga pagahimoon sa The Atrium, Limketkai Center, Cagayan de Oro City. Ang maong kalihokan gitakda nga tambongan sa kapin 1,000 ka mga business leaders, industry movers, policymakers ug investors gikan sa nagkalain-laing dapit sa Mindanao.
Matud ni Irene Floro, Convention Director of Oro Chamber, tumong sa ilang paghimo sa tinuig nga kalihokan mao ang pagpasundayag sa mga resources nga anaa sa Misamis Oriental ug pagpaila sa probinsya isip maanindot nga destinasyon sa turismo ug maayong lugar alang sa negosyo ug pagpamuhunan. Mapasalamaton usab si Floro sa makanunayong pagsuporta nga gipakita sa gobernadora sa Oro Chamber sukad sa iyang paglingkob isip lider sa probinsya ug malaumon sa personal nga pagtambong niini sa ilang dakong kalihokan.
Padayon pa ang pagsuporta ug pakighiusa ni Governor Uy sa pribadong sektor isip kabahin sa paningkamot sa pagpalig-on sa ekonomiya ug pagdani og dugang oportunidad alang sa katawhang Misamisnon.
By: Jane Salimbao/PIO
