“TABANGAN lang nato mga projects ninyo”-kini ang gibutyag ni Governor Juliette Uy ngadto sa mga opisyales sa lungsod sa Salay atol sa pagkortesiya sa LGU sa buhatan niini niadtong Pebrero 4 ning tuiga. Dako ang kalipay ni Salay Vice Mayor Jun Capistrano human ang mga proyekto nga gihangyo sa ilang mayor ug mga kapitanes positibong gitubag sa gobernadora. Matud ni Capistrano, dako og mahimong tabang ang mga giduso nga proyekto ngadto sa katawhan sa ilang lungsod. Usa na niini ang farm to market roads nga laumang maangkon sa lungsod. Tungod niini, dako og pasalamat si Brgy. Bunal Punong Baranggay Hon. Eugene Gabutan gumikan dugay na nilang gihandum nga masemento ang ubang parte sa ilang barangay hilabina anaa kini bukid nga dapit.

Samtang, nagpasalamat usab si Capistrano tungod kay nahatagan sila og slots sa scholarship program sa Panggamhanang Probinsyal butang nga wala niya damha. Pag-awhag niini sa iyang ginsakupan nga tabangan si Governor Uy ug suportahan ang iyang liderato aron molambo pa ang ilang lungsod.

Usa lamang ang Salay sa mga kalungsuran ug syudad sa probinsya nga andam tabangan sa gobernadora sa laraw nga mapaabot ug mapabati sa katawhan nga anaa nga gobyerno nga nagtagad kanila.

By: Jane Salimbao/PIO

Hulagway kuha ni: Jez Ecuacion/PIO