PAGKAB-OT SA HERD IMMUNITY TARGET KARON SA MISOR By: GEO DENQUE/PIO

Posted: September 10, 2021

193311914_866867670590919_526438529449660036_n

PASPAS ang vaccination roll-out sa lalawigan sa Misamis Oriental hilabina nga dili ikalimod nga padayon ang pagsaka sa nataptan sa Covid-19.

Gipaabot ni Provincial Inter-Agency Task Force Chief Dr. Jerie Calingasan nga ang padayon nga pagbakuna usa lamang sa mga lakang nga kung ugaling mataptan sa virus dili gyod magrabahen hinungdan nga padayon ang paningkamot sa kagamhanan sa lalawigan nga mabakunahan ang mga anaa sa prayoridad sa listahan.

Sa uwahing datos sa Provincial Health Office kutob Augusto 31 ning tuig mototal na sa 86,609/128,444 ka mga Misamisnon ang  fully vaccinated kon asa anaa na sa 67.42% sa Herd immunity nga 70%.

Ang mga bakuna nga na-administer gilangkoban sa Sinovac, AstraZeneca, Janssen, Pfizer ug Sputnik V.

Ning maong ihap moabot sa 18,991 ang nabakunahan na sa A1 nga kategorya; A2=38,111; A3=48,295; A4=22,316; A5=723 kon diin mototal sa 128,444 ang nabakunahan sa ilang 1st dose.

Samtang ang nakumpleto sa ilang 2nd dose mao ang 17,799 ka indibidwal gikan sa A1 category; A2=21,584;  A3=17,244; A4=1131; nga mototal tanan og 57,758 samtang 28,851 ka individwal ang nabakunahan sa Janssen nga usa lamang ka dosis.

Mga lakang kini sa kagamhahan sa Misamis Oriental sa pagpanguna ni Governor Bambi nga makab-ot ang herd immunity sa labing daling panahon ug dili magrabehan ang mga mataptan sa virus.

Una na nagpagawas og pahayag ang DOH-Northern Mindanao nga posibleng sa bulan sa Disyembre makab-ot na sa tibouk rehiyon 10 ang herd immunity.

Sa uwahing datos sa Covid-19 sa lalawigan kutob niadtong Septiyembre 5, ning tuig moabot na sa 1,298 ang mga aktibong kaso gikan sa 11, 213 sa kinatibuk-ang nagpositibo sugod sa pandemya ug ning maong ihap anaa na sa 9,321 ang mga naka recover  sa virus.

Walay puas ang panawagan sa PHO uban ni Governor Bambi nga padayon lamang nga sundon ang mga importanteng gabayan sa pakigbatok sa virus samtang ang kagamhanan walay hunong sab sa pangita og mga lakang alang dugang proteksyon batok niini.