WALA nay mas labing gikinahanglan karon ang atong kaigsuonan nga nag-ilaid intawon sa kalisod kon dili ayuda sa kwarta ug pagkaon. Samot pa ning pagsiaw sa coronavirus disease 2019 (COVID-19) nga naghatud og perwisyo sa ilang pangita aron makakaon katulo sa isa ka adlaw.

Dinhi sa Misamis Oriental, nakita ug nasabtan kini ni Gov. Bambi Emano, hinungdan sa sayong panahon gipang-apod apod na niini ang honorarium ug meal allowance sa atong barangay population officers sa 267 ka barangay sa una ug ikaduhang distrito sa Misamis Oriental.

Ang Barangay Population Officers sa lungsod sa Salay, Sugbongcogon, Medina, Magsaysay, Kinogitan, Talisayan, Balingoan, lagonglong, ug Binuangan, sa unang distrito; ug lungsod sa Jasaan, Villanueva, Tagoloan, Opol, Naawan, Manticao, Lugait, Laguindingan, Alubijid, sa ikaduhang distrito nakadawat sa tag-P1,000 matag usa niadtong, Abril 6, 2020, pinaagi sa ceremonial turnover the gipangulohan ni Provincial Population Officer Mr. Andrew Gapuz.

Kalipay ni Gov. Bambi Emano nga sa mas sayo nga panahon matunol na ang maong honorarium ug meal allowance sa barangay population officers aron maggamit ning panahon sa kagutom ug kalisod nga dala sa hulga sa COVID-19.