Gipahigayon ang malampusong pagsugod sa ika-44 nga selebrasyon sa Press Freedom Week nga adunay temang “Freedom of the Press: The Wellspring of Democracy,” adlawng Lunes – Mayo 25, 2026. Tumong niini nga mapasidunggan ang importansya sa gawasnong pamamahayag isip haligi sa demokrasya, tinubdan sa matinud-anong impormasyon alang sa katawhan ug ang pagpakgang sa sayop nga impormasyon. Gisugdan ang kalihokan pinaagi sa usa ka Balaang Misa diin naghiusa ang mga miyembro sa media, lokal nga opisyal, ug mga partisipante aron sa pag-ampo alang sa kalinaw, kaluwasan, ug padayong kalig-on sa industriya sa pamamahayag. Gisundan dayon niii ang motorcade isip simbolo sa panaghiusa sa mga media practitioners sa pagpanalipod sa kamatuoran ug press freedom.

Usa usab sa mga highlight sa kalihukan mao ang presentasyon sa mga kandidata sa Ms. Press Freedom nga nagpakita sa ilang kaanyag, kaalam, ug suporta alang sa media. Ang maong presentasyon naghatag ug dugang kasadya ug inspirasyon sa selebrasyon samtang gipadayag sa mga kandidata ang ilang mensahe bahin sa importansya sa gawasnong pagpahayag ug matinud-anong paghatod sa balita ngadto sa publiko. Dugang pa niini, aduna pay nagkadaiyang kalihokan nga giandam alang sa tibuok semana nga selebrasyon sama sa basketball friendship game, outreach program, bowling tournament, seminar, ug uban pang aktibidad nga nagtumong sa pagpalig-on sa panaghiusa, kooperasyon, ug maayong relasyon sa mga miyembro sa media ug sa komunidad.

Sa Kalihokan nagkahiusa ug nakigduyog ang Provincial Information Office sa pagpangulo ni PIO Officer in Charge Maam JoaneTabique isip kabahin sa pagpalig-on sa panagtinabangay alang sa hustong paghatod sa impormasyon ngadto sa katawhan. Ang kalihokan gisuportahan sa Inahan sa lalawigan Governor Juliette Uy isip pagpakita sa suporta sa kagamhanang probinsyal alang sa responsible ug matinud-anong mamahayag nga adunay dakong papel sa pagpalambo sa demokrasya ug paghatod sa husto nga impormasyon ngadto sa katawhan.

Gilauman nga pinaagi sa maong mga kalihokan, mas mapalalom pa ang pagsabot sa katawhan sa papel sa media sa pagpanalipod sa kagawasan sa pagpahayag ug sa pagpalambo sa demokrasya pinaagi sa matinud-anon ug responsableng pamamahayag.

By: Ellen Mae Lahinao/PIO

Hulagway kuha ni:Jezreel Ecuacion/PIO