IMPLEMENTASYON SA P7 MILLION WORTH NGA MGA PROYEKTO SA PATROCINIO NHS GISUGDAN NA By: REYMARK SEMAÑA/PIO

Posted: September 10, 2021

240717517_927469967864022_2075729914761021370_n

DILI masukod ang kalipay sa mga magtutudlo sa Patrocinio National High School sa munispyo sa Claveria human makita ang implementasyon sa mga proyekto sulod sa ilang tunghaan nga dugay na nilang gipangandoy.

Atol sa culminating activity sa Brigada Eskwela 2021 niadtong Lunes, Septiyembre 6, 2021, nanguna si Governor Bambi Emano uban ni Claveria Municipal Mayor Meraluna Abrogar ug Misamis Oriental Schools Division Superintendent Dr. Jonathan Dela Peña sa capsule laying o ground breaking sa mga proyekto nga buot ipatuman sa panggamhanan sa probinsya sulod sa ilang tunghaan.

Pinaagi sa Local School Board (LSB), ipatuman sulod sa tunghaan ang pagpatukod og stage ug electrical installation sa covered court, pag-semento sa covered court, pag-semento sa 200 meter nga dalan ug pagbutang og 2 ka basketball ring nga adunay fiberglass board ug post nga sa kinatibuk-an mobalor kini og P7,000,000.00.

Ang Patrocinio NHS maoy regional winner sa Brigada Ekswela 2020 ug nag grand slam na sa mid-high school category ug gitakdang mosangka sa national level sa Best Implementing School sa Brigada Eskwela.

Matud ni Mr. Jose L. Ambonglay kinsa maoy Principal sa Patrocinio National High School nga nahiuyon ang implemenstasyon sa mga proyekto sa panginahanglan sa ilang tunghaan.

“Kung atong tan-awon in the future pagkawala na sa pandemic mapuslan na gyud kaayo ning mga proyektoha… kung inana nga walay mga facilities so dili siya (tunghaan) ma improve… so mao na nga dako gyud kaayo among pasalamat ni Governor Bambi nga naa ni nga mga proyektoha.”

Mapasalamaton nga pamahayag sa Principal.

Namatikdan sab niini nga sukad pa kaniadto nahimo na nga prayoridad ni Governor Bambi Emano ang edukasyon sa lalawigan.

“Atong makita ang suporta ni Governor Emano sa Department of Education sugod pa sa una nga mga panahon bisan pa man gani niadtong wala pa siya na Gobernador.” dugang niini.

Kahinumduman nga niadtong tuig 2015 ug 2018 ang perimeter fence ug 2 storey classroom building ang gitanyag sa panggamhanan ngadto sa tunghaan.

Malipayon usab nga gipahibalo sa Principal nga dili makaangkon og award ang ilang tunghaan kong wala ang tabang og suporta sa lalawigan nga sobra-sobra ang gihatag alang kanila.

Usa sa mga haligi nga nagtuko sa nag-unang programa ni Governor Bambi nga turismo mao ang Edukasyon kini tungod nakita sa amahan sa lalawigan ang dakong papel nga mahatag sa maong sektor nga mapalambo ang natad sa kinabuhi sa katawhan ug kini sab maoy iyang ibilin nga legasiya sa lalawigan isip amahan nga dunay pagbati sa panginahnaglan sa kabataan.

(HULAGWAY KUHA NI JEZREEL ECUACION/PIO)