ISOLATION CENTER SA MISOR UG UBAN PROYEKTO DI MABALDA ANG KATUKORAN

Posted: August 13, 2020

13082020-1

‘ON FULL BLAST’ ang tanang proyektong imprastruktura karon sa Misamis Oriental.

Gibutyag ni Governor Bambi Emano atol sa gipahigayon nga virtual flag raising ceremony, adlawng Lunes, Agusto 10, 2020 nga padayun gihapon ang mga proyekto sa imprastraktura sa probinsya taliwala sa giatubang karon nga pandemya.

Matud sa gobernador nga bisan paman sa tanan pagsulay ug kalisud padayun gihapon ang mga programa labina katukoran sa mga proyekto dinhi sa lalawigan.

Dugang niini nga ‘on full blast’ ang tanang proyekto pag-abot sa imprastraktura sama sa katukoran sa Covid-19 Isolation center nga nahimutang sa lungsod sa Alubijid ug ang pinaka-una nga Olympic-sized swimming pool sa lungsod sa Naawan.

Gipaniguro usab ni Governor Bambi nga bisan padayun ang trabaho sa maong mga proyekto, nasunod gihapon ang mga health protocol sama sa physical distancing ug uban pang mando sa Provincial Task Force for Covid-19.

Nasayud si Gov. Bambi nga kinahanglan gihapon ang balanse nga pagpanglihok-lihok ug dili angayan irason ang pandemya sa paghunong sa mga importante nga proyekto kay gikinahanglan ang pagpadayun sa serbisyo ning pagsagop sa new normal.