KABASKOG SA PANGLAWAS GIKINAHANGLAN SA PAGBATOK SA COVID-19

Posted: July 20, 2020

2072020-4

WALAY puas ang pahimangno ug pasabot ni Dr. Jerie Calingasan ang chairman sa Provincial Task Force for Covid-19 nga gikinahanglan karon panahona mao ang kabaskog sa panglawas ug pagpakisayod sa kaugalingon sa pakigbatok sa Corona Virus Disease (Covid-19).
Atol sa virtual flag raising ning bagohay lang iyang gipaabot sa mga empleyado sa kapitolyo probinsyal ug katawhan sa lalawigan nga labing maayo nga batasanon ang pag monitor sa kaugalingon nga panglawas.
Lakip niini ang kinahanglan nga pag-pabaskog sa resistensiya, pag-inom sa bitamina, pagmintinar sa himsog nga panglawas, pag-obserbar sa social ug physical distancing, kanunayon ang paghugas og kamot, respetuhon ang oras sa curfew ug padayon nga self monitoring aron malikayan nga mataptan sa makamatay nga virus.
Gipaabot sab niini nga ipadayon ang mga traditional nga pamaagi sama sa ‘toub’ kay taliwala dili kini mao ang tambal sa virus makagaan kini sa adunay gibati.
Dugang ni Dr. Calingasan nga tanan katawhan doul ug vulnerable sa virus hilabina sa nagkataas nga kaso niini apan padayon nga pahimangno sa katawhan sa lalawigan nga sundon ang mga gabayan aron makalikay niini ug monituron kanunay ang kaugalingon.