KABUS, MAOY GRABENG APEKTADO SA KRISIS DALA’S COVID-19

Posted: April 23, 2020

91356861_577306706213685_4257501952679608320_o

ISA lamang si Lito John Calibay, fish vendor nga taga Luz Banzon, Jasaan, Misamis Oriental, nga grabeng naapektuhan sa krisis nga dala sa hulga sa coronavirus disease 2019 (COVID0-19). Ang pangisda ni Calibay mao lamang intawon ang iyang gisaligan aron makalatas sa inadlaw-adlaw nga pagpakabuhi. Apan, wala niini igsapayan ang deklarasyon nga general community quarantine sa lalawigan, tungod kay nakasabot siya nga alang kini sa kaayohan sa tanan, lakip iyang pamilya.

“Sa akoa, angayan man gihapon (general community quarantine) para makaiwas sa mga sakit nga delikado. Sa akoa apektado gyud kay negosyo ning akoa biya panginabuhi man gud ning akoa,” guol nga sulti ni Calibay.

Si Analie Pagalan, ang rural health midwife sa Jasaan, isa sa mga frontliners sa lugar nga tigkuha’g temperatura sa Villanueva-Jasaan boundary checkpoints. Dili niini igsapayan ang hulga sa makamatay nga sakit, kakapoy ug kabilar, ug gusto niining madali’g kahuman ang krisis, maong nanawagan sa katawhan nga unta mokooperar ang tanan.

“Sa mga katawhan nga muagi dinhi sa checkpoint dinhi sa Aplaya, Jasaan, mukooperar gyud alang sa pagtabang sa komunidad para ma-prevent nato ang pag-spread sa corona virus, simbako ko lang mag abot dinhi sa amoa,” hadlok nga sulti ni Pagalan.

Walay hunong nga gipasabot ni Gov. Bambi Emano sa publiko nga sa dili madugay mahimong magmalampuson kita sa pagpakigbatok sa COVID-19. Apan, gikinahanglan ang kooperasyon sa tanan, antos lang sa kalisod sa panginabuhi, aton malatas kining hulga nga nagdala’g krisis sa ekonomiya ug panginabuhian. Hinuon, gisiguro sa gobernador nga andam ang kapitolyo mo-ayuda niadtong nagkinahanglan sa hinabang, hilabina kabus ug katigulangan, kinsa maoy gilantaw niini nga tabangunon kaayo.

Pinaagi sa Provincial Social Welfare and Development Office (PSWDO), adunay masandigan ang katawhan sa Misamis Oriental samtang anaa sila sa kalisod sa panginabuhian ug pagkaon karong panahona.