PORMAL nang gilusad ang “Walang Gutom” program lakip ang pagpinirmahay sa Memorandum of Agreement tali ni Gov. Juliette T. Uy ug mga mayores sa probinsya. Malampusong natigayon ang gikahinamang programa, adlawng Martes – Mayo 26, 2026 sa provincial capitol partikular sa hawanan kung asa nahimutang ang DSWD extension office. Laraw niini nga programa ang mahatagan og kahigayonan ang labing nanginahanglan alang sa tingusbawan sa ilang pagpamuhi. Ang maong pagpinirmahay nagsilbing timaan sa hiusang kolaborasyon sa kagamhanang probinsyal. Panghinaot usab ni Gov. Juliette T. Uy nga mapadayon ug malugwayan ang maong tinguha. Saad niini nga tutokan ang matag sektor agi’g patas nga pagtagad pinaagi sa pagpaminaw ug pagtubag sa unsa mang ihangyo sa matag LGU kutob sa makaya sa panudlanan sa probinsya.
Sa laing bahin, paabot nga mensahe nila ni DSWD 10 Regional Program Coordinator Ms. Belinda P. Sarabia ug Director Chief Potri Jallila T. Taha nga subay sa nasyonal nga mandato, gikatakdang mapaubsan ang kapobrehon niini. Ug ang susamang programa dunay organisado ug digitalized nga sistema kung asa mas dali na ang paghatag kon transfer sa assistance ug dunay transparensiya niini sa matag transaksyon lakip monitoring sa mga benepisyaryo. Ning higayona, mokabat 3,784 ihap sa household beneficiaries kung asa anaa silay Php 3,000 balor nga monthly food credits sulod sa tulo ka tuig. Kini nagpasabot nga makakuha og food items gikan sa mga accredited stores ug retailers sama sa bugas, tinapay, itlog, ug uban pa. Gisaksihan usab kini sa mga kadagkoan gikan sa Department of Social Welfare and Development (DSWD), Congress representative, Provincial Board Member ug mga dinapit nga bisita.
Mipaabot mensahe si Balingasag Mayor Alexis Quina human sa makasaysayanong Commitment Signing uban ang nagkadaiyang opisyales nga suportado gayod nila ang maong programa. Lakip si Special Assistant to the 1st Congress Mildred Lagbas-Mondigo malipayong misuporta niini. Samtang anaa sa kalihukan ang presensya sa pipila ka benepisyaryo gikan sa Brgy. Waterfall, Balingasag. Si Lolita Jarabe nga usa sa mga midawat sa maong ayuda labihan ang pasalamat tungod dakong tabang na kini sa ilang inadlaw-adlaw nga panginahanglanon ning panahon sa krisis.
Sa pagpanguna sa PSWDO uban sa ulo niini nga si Jhunleymar Abella, komitado gayod nga mapadayon ang tiunay nga kolaborasyon sa nasyonal ug partner agencies labina subay kini sa prayoridad ni Gov. Uy nga mapukan ang kapobrehon pinaagi sa pagtanyag og social services.
By: Rejiann Ammor R. Maygay/PIO
Hulagway kuha ni: Marvin Gilig/PIO
