Mokabat sa kapin syete milyones (7,380,000) pesos ang malampusong gitunol sa mga benepisyaryo sa Special Program for Employment of Students (SPES) sa probinsya. Moabot sa 1,000 ka mga benepisyaryo ang nakadawat sa tag 7,380 pesos gikan sa Kapitolyo Probinsyal isip suholan sulod sa 20 ka adlaw nga pagtrabaho. Sulod sa maong mga adlaw, naghimo sa pagsurvey ang mga SPES grantees sa matag pamilya nga unemployed aron matabangan nga makabaton og trabaho.
Gisugdan ang pay-out niadtong Disyembre 4 ning tuiga diin gitunolan ang mga lungsod sa Opol paingon sa Jasaan samtang sa Disyembre 5 gitunolan ang mga benepisyaryo sa lungsod sa Balingasag paingon sa Magsaysay. Ang SPES usa ka programa sa Department of Labor and Employment (DOLE) nga naghatag og temporary employment ngadto sa mga poor but deserving students panahon sa ilang school breaks. Tumong sa programa nga matabangan ang mga estudyante nga makapadayon sa ilang pagskwela pinaagi sa paghatag og kinitaan samtang mahanas sa pagpanarbaho bisan paman sila anaa pa sa pagtungha.
Usa lamang kini sa mga programa sa mga kabatan-onan nga labing gisuportahan ni Governor Juliette Uy sa tinguha nga mahatagan sila sa maayong ugma sa umalabot.
By: Jane Salimbao/PIO
Hulagway kuha ni: Mel Theresa G. Ruales/PIO
