Mokabat sa kapin usa ka milyon ka pesos (1,265,500) ang personal nga gitunol ni Governor Juliette Uy isip cash incentives alang sa mga kabataang atleta gikan sa Misamis Oriental nga misangka sa Palarong Pambansa 2026. Moabot sa 137 ka mga atletang Misamisnon ang nakadawat sa maong incentive nga gihimo mismo sa ilang billeting quarter sa Bayugan City, Agusan del Sur niadtong Mayo 23, 2026. Matag indibidwal nakadawat og tag 10,000 pesos samtang 20,000 pesos alang sa matag grupo kinsa nakasakmit sa gold medal atol sa Northern Mindanao Regional Athletic Association (NMRAA) sa Malaybalay City, Bukidnon.
Tungod niini, nalipay si Shayne Mark Monreal, usa arnis gold medalist gikan sa Initao, Misamis Oriental gumikan sa incentive nga nadawat gikan sa gobernadora. Matud usab ni Michael Jordan Abragan, Head Coach for Delegation of Arnis sa tibuok rehiyon 10 ug usa ka magtutudlo sa Initao Central School, usa ka dakong butang ang personal nga pagbisita sa gobernadora tungod kay naghatag kini og inspirasyon ug dugang kumpyansa sa mga atleta. “Kami mapasalamaton kay niabot si Governor Juliette Uy diri sa Agusan del Sur. Dako kaayo ni nga pagboost sa confidence sa mga bata nga ang governor gauban sa amoa ug naay suporta sa amoa,” matud ni Abragan.
Gitakda usab nga mutunol ang Panggamhanang Probinsyal sa incentives alang sa mga regional bronze ug silver medalist sa umalabot nga himoon sa Kapitolyo. Gisugdan ang opening ceremony sa maong kalihokan niadtong Mayo 24 sa Democrito O. Plaza Sports Complex, Patin-ay, Agusan del Sur ug molungtad hangtud Mayo 31 ning tuig. Tumong ni Governor Uy nga personal nga mapadasig ug mapalig-on ang moral sa mga kabataan samtang nagrepresentar sila sa probinsya sa ilang tagsa-tagsa ka dula sa Palarong Pambansa.
By: Jane Salimbao/PIO
Hulagway kuha ni: Charm Andy Pacamalan/PIO
