KAPITOLYO, MITUNOL OG 120 COMPLETE SET PPE SA AIRPORT SECURITY

Posted: June 22, 2020

22062020-4

ATOL sa online flag-raising ceremony sa kapitolyo probinsiyal sa Misamis Oriental niadtong Lunes, Hunyo 08, 2020, nakadawat og 120 complete sets sa personal protective equipment (PPE) ang personahe sa Aviation Security Unit – 10 sa Laguindingan airport sa Laguindingan, Misamis Oriental.
Didto sa turnover ceremony si Aviation Security Unit – 10 chief PCol. Raneil Valones, kinsa maoy midawat sa PPE gikan kang Gov. Bambi Emano ug Provincial Task Force for COVID-19 chief Dr. Jerie Calingasan. Kini, aron todo protektado sila batok sa pagtakboy sa coronavirus disease 2019 hilabina sa pagdagsang sa overseas Filipino workers (OFWs) ug locally stranded individuals (LSIs) sa tugpahanan sa umalabot nga mga adlaw.
Gibutyag ni PCol. Valones nga insakto lamang ang 120 sets sa PPE alang sa iyang pwersa, samtang daku na kaayo kini og tabang aron dili sila mataptan sa makamatay nga virus, lakip na usab ang ilang mga minahal sa kinabuhi.
Duna may kahadlok tungod sa pagsaka sa ihap sa nagpositibo sa COVID-19 sa dakbayan sa Cagayan de Oro nga nahimutang sentro sa Misamis Oriental, apan kompiyansa si Gov. Bambi Emano ug Dr. Calingasan nga magpabiling zero-confirmed case sa COVID-19 ang lalawigan, tungod kay gawas nga adunay kooperasyon ang matag Misamisnon, hugot pa gayud ang pagpatuman sa otoridad batok sa pagkaylap sa COVID-19.