KASAULOGAN SA ‘BAYANIHANG BULILIT 2021’ NAGMABULUKON By: REJIANN AMMOR R. MAYGAY/PIO

Posted: September 16, 2021

241731342_141807428145270_7208172974965233447_n

MABULOKON ang pagsaulog sa Bayanihang Bulilit 2021 nga nagdala sa tema:“Caring for our children is caring for our future.”

Luyo sa dakong hagit dala sa gisagubang nga pandemya ning kasamtangan nagmahinungdanon ang tinuig nga kalihokan nga nagsumikad sa gugma nga walay kinutuban nga gipaningkamotan sa buhatan sa Provincial Early Childhood Care and Development Office sa pagpangulo ni Ms. Maryden Ocot.

Ang Bayanihang Bulilit nagsilbing Provincial ECCD Office’s version sa Brigada Eskwela ubos sa Department of Education nga nagsugod niadtong Septiyembre 7 hangtud 17.

Naandan na kaniadto sa wala pa ang pandemya ang pagpahigayon og one-day refurbishing activity sa piling CDCs nga mihatag haruhay ug plastar nga learning facility sa tanang Child Development Workers/Teachers ug Child Learners.

Subay sa gikinahanglan nga mga adjustment gihingusgan sa PEECD- MisOr nga mahatagan prayoridad ang pagpanghatag og nagkadaiyang disinfectants lakip na ang mga ginalon nga mga alcohol ug chlorine, mga gallon sab nga dunay faucet alang sa hand-washing, face masks, foot baths, hand sanitizers, liquid soaps, liftable face shields ug digital thermometers.

Kining mga materyales galamiton kaayo aron masiguro nga makagahom ang tanang NCDCs ug CDCs sa pagtigayon og disinfection procedure ayha magsugod balik ang klase sa umalabot.

Ang programa gipaluyohan sa 756 Child Development Workers sulod sa 716 Child Development Centers lakip ang 22 ka National Child Development Centers sa tibuok lalawigan sa Misamis Oriental ug gisalmotan sab ang maong duha ka semanang kalihukan sa mga Provincial Board Members, LGU officials, CSWDOs ug MSWDOs, ug ECCD Focal Persons sa matag lugar.

Atol sa selebrasyon mihatag sa ilang mensahe ang mga CDWs nga tanan nagtumong ngadto sa dakong kahimoan sa mga programa ubos sa liderato ni Gobernador Bambi Emano.

Gani dako ilang pasalamat sa oportunidad  kay nahimo silang tulay aron nga dili mabalda ug samot mapalawig ang panerbisyo sa natad sa edukasyon ngadto sa mga kabataan.

Tinguha gyod ni Gobernador Bambi uban ang tibuok pwersa sa PECCD nga magtimbayayong ang tanan alang sa kanunay nga paghatag ug pagsiguro nga ang mga child learners dili mahikawan sa pagbaton sa insaktong edukasyon nga dunay luwas ug himsog nga tunghaan sa pagtoun.