KAWANI SA KAPITOLYO, GITAGSAA’G THERMOMETER

Posted: June 8, 2020

862020-7

GIHINGUSGAN pa sa Provincial Task Force for COVID-19 ug ni Gov. Bambi Emano ang depensa batok sa coronavirus disease 2019, pinaagi sa paghatag tagsa ka thermometer ang mga empleyado sa kapitolyo niadtong Martes, Hunyo 2, 2020.
Sa primero, nakurat ang mga kawani sa kapitolyo, apan nakasabot ra gihapon sa katuyoan ni Health Officer ug concurrent Provincial Task Force for COVID-19 chief Dr. Jerie Calingasan ug Gov. Emano, aron sila na mismo mokuha sa ilang kaugalingong body temperature kaduha matag adlaw.
Matud sa duha ka opisyal, bisan anaa na sa MGCQ kon luag nga paglihok-lihok sa mga tawo, samot palig-unon ang depensa sa matag usa pinaagi sa pagsuta sa body temperature matag karon ug unya. Dili man gud mahimo nga kanunay dunay mosuta sa kainit sa ilang lawas, apan maayo nga ang mga empleyado na mismo adunay responsibilidad sa ilang kaugalingon.
Matag adlaw’ng Biernes, kolektahon sa matag ulo sa departamento ang recorded body temperature sa matag kawani sa kapitolyo aron sa pagsuta kon angay ba kini ipaubos sa makuting health safety protocols. Kung ang body temperature 37.7 degrees celcius, itaho gilayon kini sa PHO aron maatiman.