GIPAHIGAYON ang usa ka hinungdanong meeting tali sa Korean Marine Equipment Research Institute (KOMERI) uban si Center Leader Mr. Lee Nyung Won, ug lain pang Korean investors lakip sila Mr Kim Sung Yoon sa Fire Insurers Laboratories of Korea (FILK), Lee Gil Yong, Lee Ju Yoon, ug Kim Dy Youl. Kini nga miting usa ka proposal pa lamang, diin ang mga negosyanteng Koreano maoy magpresentar sa proyekto ngadto sa Gobiyerno sa Korea, aron mangayo og pormal nga pag-apruba ug suporta. Apan klaro ang tumong: usa ka proyekto alang sa katawhan sa Villanueva ug sa tibuok Misamis Oriental, ilabi na alang sa atong mangingisda. Ang miting gitambongan usab sa Lokal nga Gobyerno sa Villanueva, nga giila isip industrial hub sa probinsya, uban ni Mayor Julio Uy, ug sa Provincial Government of Misamis Oriental nga gipangulohan ni Governor Juliette T. Uy.
Tumong sa Proyekto:
Pagpalambo og mapa lig-on nga mga sakayan (boats) gamit ang teknolohiya gikan sa Korea, tungod kay ang KOMERI usa ka eksperto sa shipbuilding ug maritime equipment. Ang proyekto maghatag og kompletong suporta gikan sa training, paghimo sa sakayan, hangtod sa after-care ug maintenance—aron mas lig-on ug mas produktibo ang panginabuhian sa atong mga mangingisda. Ang unang target mao ang Villanueva, ug sa umaabot, ipalapad kini sa tibuok Misamis Oriental. Sa presentasyon, gipakita sa probinsya ug sa munisipyo nganong angay saligan ug investan ang Misamis Oriental, ilabi na ang Villanueva. Sa bahin sa Korean investors, aduna na silay duha ka posibleng lokasyon paghuman mubisita sa mga possibling mahimong lokasyon sa proyekto, ug naglaum sila nga hatagan kini og pag-apruba sa Gobiyerno sa Korea.
Sumala ni Governor Juliette Uy:
“Unta mapaspasan ang proyekto para sa katawhan sa Misamis Oriental.”
Hayag nga Kaugmaon ang mensahe sa niining adlawa. Kung matuman, kini nga proyekto mahimong bag-ong kusog sa atong baybayon—mas luwas nga sakayan, mas lig-on nga kita, ug mas hayag nga kaugmaon para sa atong mga mangingisda. Magpadayon ang probinsya sa pagtrabaho, paglaum, ug pagpaningkamot aron ang maayong mga plano karon mahimong tinuod nga kaayohan ugma para sa tanang Misamisnon.
By: Zyrus James Gelizon/PIO
Hulagway kuha ni: Zethrie Velonta/Villanueva MIO
