KRIMINALIDAD SA MISOR MIKUNHOD

Posted: August 11, 2020

1182020-6

GUMIKAN sa hugot nga kooperasyon ug tinabanga sa katawhan uban ang nagkalain-laing sektor sa gobyerno ug pribado taas ang pagkunhod sa kriminalidad sa Misamis Oriental.

Atol sa gipahigayon nga joint regular meeting sa Provincial Peace and Order Council (PPOC), Provincial Disaster Risk Reduction Management Council (PDRRMC) ug Provincial Anti-Drug Abuse Council (PADAC) niadtong adlawng Biyernes, Agusto 7, 2020, gipaabot sa kapulisan ang mga nahimong kalampusan sa operasyon kabahin sa pagsikop sa mga tawo nga nagbuhat sa kriminalodad sulod sa bulan sa Enero ngadto sa bulan sa Hunyo ning tuig.

Kon itandi sa unang kwarter niaging tuig nakatala ang kapulisan og 1,582 crime incident samtang karon nagtala na lamang sa 1,256 ning tuig 2020.

Nagmalampuson usab ang kapulisan sa kampanya batok pagpangdakop sa mga wanted person, loose firearms, illegal logging, illegal drugs, illegal fishing, illegal gambling, ug crime against property.

Kalabot sab sa pagpatuman sa Local Ordinance sama sa pag-inom og makahubog sa gibawal nga lugar, smoking-ban, pag-hukas sa mga pampublikong lugar, paglapas sa curfew hours, nakatala ang kapulisan sa lalawigan og 1,585 ka mga violators.

Samtang sa pagpatuman sa kamandoan ni Presidente Rodrigo Duterte kon PRRDs focus directives sama sa pagsikop sa mga overloading nga sakyanan, wala pag-suot sa helmet ug seatbelt, wala pagbaton sa driver’s license sa pagmaneho, nakatala ang kapulisan og 7,526 ka mga nakasupak niini.

Sa kinatibuk-an ang kahimtang sa kalinaw ug kahusay sa probinsya sa Misamis Oriental nagpabilin nga lig-on, malinawon ug luwas.

Kini tungod sa pagpaningkamot sa Provincial Police Office uban ang Local Government Unit (LGU’s), mga nagkalain-laing ahensiya sa pagpatuman sa balaod ug ang padayon nga partisipasyon sa komunidad.

Nagpabilin sab ang kamalinawon sa lalawigan gumikan sa walay hunong nga suporta sa gobyerno sa probinsya sa Misamis Oriental ubos sa liderato ni Governor Bambi Emano nga nakapahimo sa kapulisan nga himoun ang ilang tahas, maayo nga buluhaton, misyon ug katuyoan sa pagpakigbatok sa lain-laing kriminalidad.