DUGANG P500,000 nga cash ang gidonar sa Kapitolyo Probinsyal ngadto sa Northern Mindanao Medical Center (NMMC), dugang hinabang sa balay-tambalanan sa pagpakgang sa coronavirus disease 2019 (COVID-19).

Gidawat ni NMMC chief of hospital Dr. Jose Chan ang cheke nga gitunol ni Gov. Emano niadtong Lunes, Abril 13, 2020, atol sa pagpakayab sa nasudnong bandila sa kapitolyo.

Gikan sa King Energy Generation Inc. ang maong kantidad. Tungod sa ilang pagsalig kang Gov. Emano, gihimong tulay ang gobernador aron masiguro nga modangat gayud sa NMMC ang ilang kaugalingong hinabang.

Dili mahutdan sa iyang pagpasalamat si Dr. Chan sa laing kantidad nga daku uyamot og ikatabang alang sa ilang kombate pagluwas sa mga pasyente nga “probable” ug “confirmed” sa makamatay nga virus.

Si Mr. Ramel Inzo, ang safety health environmental manager sa King Energy, nagkanayon daku ilang pagsalig kang Gov. Emano nga ma-plastar gayud og maayo ang ilang hinabang ug mopadulong gayud sa hustong paingnan.

Sa milabay nga duha ka semana, dunay P1 milyon cash ang nadawatan sa NMMC gikan sa punudlanan sa kapitolyo.